* اهلا..ازيك..؟
- بخير يا عمو..سألت عليك العافيه..بس ايه ده..ما شاء الله..عينى عليك بارده..
صاحى النهارده مزاجك رايق و بترحب بيا كده يعنى..تتحسد و الله..
* يعنى..قررت اغير اسلوبى معاك شويه..
-ازاى يعنى..؟ـ
* يعنى..اكلمك كويس شويه..و اضحك ف وشك حبه..و كده يعنى.
- خير اللهم اجعله خير..هو حصل ايه فى الدنيا..يا ترى ايه اللى غيرك كده..؟!
*ابدا يا حبيبى..انا قلت مافيش داعى يكون فيه اى توتر بينا و بين بعض..احنا ف الاخر اصحاب ..
و الناس هنا كرما و هيضيفونى فأكيد لازم اعاملهم كويس..ولا ايه..؟!
( يابن اللئيمه..عاوز تضحك عليا و تبلفنى بكلمتين, و تبلطج انتا بقى على حسهم و تقعد بللوشى )
- اه اكيد طبعا..امال ايه؟!! ده اكرام الضيف واجب برده..
انما قولى يا عمو يعنى..بما اننا فتحنا صفحه جديده, و ابتديت تعاميلنى كويس و تضحك فى وشى..
ما تيجى نتكلم كده فى كام موضوع.
* آيوه حبيبى..طبعا طبعا..و ماله..قول كل اللى انت عاوزه..
- بصراحه كده يا عمو انا عاوز اشتكيلك من بنتك "سوسو" ..عجبك العمايل اللى بتعملها دى..؟!
* خير يا حبيبى..عملت ايه "سوسو"..؟!
( ايوه..استعبط استعبط..قال يعنى مش عارف )
- عملها اسود و مهبب..من ساعت ما جبتهالنا سنه 48 و هيا ارفانا ف عيشيتنا..
كل شويه نازله ضرب و تكسير ف اللى حواليها..
و كل مره نقعد و نكلمها..يا بت استهدى بالله و أتهدى بقى و خليكى ف حالك, و عيشى ف امان الله..
تقولك حاضر, ماشى, خلاص اخر مره..و نتفق معاها, و تخرج مالقعده انيل م الاول..
قلنا نعملك خاطر و نكبرك و قلنلها هنقول لبابا..
قالت و ايه يعنى..بابا سبور..و مش هيعملى حاجه..
قال صحيح انتا سبور..؟!
* هههههههه..يخرب عقلك يا سوسو..مش معقوله البت دى..سبور..! هههههه انا سبور ههههههههههههه
( ايه العبيط ده؟!!! فرحان قوى..دى بتقول عليك قرطاس..و فاضلك قرنين و تبقى ولا مؤاخذه )
- سبور ايه و هباب ايه دلوقتى..انا بكلمك على عمايلها دى..هتعمل معاها ايه..؟!!
* معلش حبيبى..استحملوها شويه عشان خاطرى..هيا اصلها طايشه شويه..معلش بكره تكبر و تعقل..
اصبر عليها بس.
- نصبر ايه بس اكتر من كده؟!!!! ما صبرنا عليها كتير..من ساعه ما جبتهالنا و احنا عمالين نصبر..
صبرنا عليها ف 56 و صبرنا ف 67 لما جبنا اخرنا ف الصبر..
و لما ضربناها ف 73 جيت انتا جرى تقول بنتى, حرام متضربوهاش..
و عملنالك خاطر و قلنا معلش الطيب احسن..و يوميها انتا قلت انك هتربيها كويس, و هتلمها..لكن اهه..
رجعت ريما لعادتها القديمه..
( و طلعت راجل خرونج..و " سوسو" قرطستك )
* يا حبيبى الصبر...انتا مش عارف ان طوله العمر تبلغ الامل..؟
مش فيه مثل عندك بيقول .. اصبر على جار السوء لا يرحل لا تيجى مصيبه تشيله..؟
( يا سلااااام.. لو تشيلكم سوا )
- الا قولى يا عمو..انتا مبتخدهاش عندك ليه؟ هيا مش بنتك؟!! ولا انتوا تخلفوا و ترموا,,
و تبلوا الناس ببلاويكم.
* اخدها؟!!! اخد مين؟..لالالا كله الا كده..انسى يا حبيبى مينفعش..معنديش مكان خالص..
{ قال اخدها قال..خدها ربنا }..
- طيب و الحل .. هتعمل ايه دلوقت ف الموضوع ده..؟!
* ميكونش عندك فكره يا حبيبى..انا هكلمها, و هزعقلها جامد خالص مالص..و هملصلك ودانها..
( ايوه.. و قلها العبى انتى و اصحابك سوا سوا و متضربوش بعض..انتا الكلام معاك خساره, يا راجل يا..., ولا بلاش )
- عموووو..شويه هوا بس عشان النفس..
سلام يا عمو..أشوفك أمس..
ليست هناك تعليقات:
إرسال تعليق