ـ فالاول احب ارحب بحضرتك..اهلا و سهلا بيك..
* امممممممم.. يييه يييه.. اهلا.
( بدايه مش لذيذه..معوج على ايه من اولها..بس ماشى نستحمل )
- فى الاول احب اتعرف بيك, و تعرف الناس بيك..
* ايه ده.. انت متعرفنيش..؟!!!
( ايه المجنون ده.. اعرفه منين..يكونش فاكر نفسه فان دام )
- لا و الله..ماتأخذنيش..مش واخد بالى
* انا الامريكانى الجامد.. الامريكانى الفظيع..ازاى متعرفنيش.. ؟!!!
( ده باين عليه عبيط...ربنا يتوب علينا من البلاوى اللى بنقابلها دى )
- اه طبعا يا برنس..معلش العتب ع النظر.. الامريكانى الفظيع..نار على علم يا باشا..
*ايوه كده..شغل مخك شويه..بلاش الغباء ده..
( ماشى يابن......يابن الذكيه..ربنا يصبرنى عليك )
- و بتعمل ايه بقى هنا يا عم الفظيع..قصدى يعنى جاى بلدنا ليه ؟
*و انتا مالك انتا..!
( انا مالى.., امال مال مين يا..., استغفر الله العظيم , بلاش الطيب احسن )
- انا بس بسال, يعنى بندردش شويه مع بعض..
* همممممم...بلدكوا عجبانى..قررت أجى هنا شويه..عندك مانع..؟
- لا ولا مانع ولا حاجه, بس عاوز افهم.. عجباك يعنى ايه؟
* يعنى عجبانى..غريبه دى؟
- لا غريبه ولا حاجه.. ناس كتير غيرك برده بتعجبهم..الاهرامات و ابو الهول و النيل و الاثار و....الخ
* لا لا.. انا مش مهم عندى الحاجات دى ..
- امال عجباك يعنى ايه..؟!
* انت بتسال كتير اوى..و رغاى اوى..
- معلش يا عم استحملنى.. بندردش..
* اوففف..طيب شوف حاجه تانيه ندردش فيها..
- ماله بس السؤال ده .. مش عاجبك ليه ؟!
* مش شغلك.. انا ارد ع اللى انا عاوزه..
( ماشى يا عم الجامد )
- اوكى.. براحتك..نغير السؤال.. انتا جيت فى جمل.
* لا جيت فى طياره.. ههههههههه
( يخرب بيت السخافه.. دمك يلطش )
- ههه..ممما علينا..قولى ناوى تقعد هنا قد ايه ؟
* هممممم, يعنى حسب الظروف..على العموم كل ما قعدت اكتر, اكيد ده ف مصلحتك.
- لا معلش بقى مش فاهم..ف مصلحتى ازاى يعنى.. ؟!
* يعنى هتتقدم شويه و تتطور..هحررك..
- ازاى..؟!!!
* انا وجودى فى اى بلد بيزودها..و بيخليها تتحرر اكتر و تتطور, بدل التخلف و الجهل اللى بتكون فيه..
انا عاوز اخليكم زينا..
- ياسلاااااام.. احب فيك قلبك الطيب, و احساسك المرهف بالناس..
* همممم..انا كده..طول عمرى خيرى على الناس..
( طول عمرك ايه يا اكدب خلق الله..انتا اصلا عمرك كله كلم سنه )
- لا ما هو باين اكيد طبعا..بس يعنى فى سؤال كده محشور ف زورى, ولامؤاخذه..ممكن اساله ؟
* اوففف..اسأل..
- مشوفناش يعنى التطور و التقدم و الحريه اللى انتا بتتكلم عليهم, لما رحت العراق و قبلها افغانستان..
لعل المانع خير..
* ازاى..؟! انتا مشفتش اول ما دخلت عملت ايه و طورتهم ازاى..مشفتش التمثال بتاع صدام و هو بيقع..؟!
- طبعا طبعا..شوفته..امال ايه.. حاجه ايه, عظمه..و شوفتك كمان لما كنت بتدور ع النووى فى البيوت..
لما كنت بتخرج الستات من البيوت رافين ايديهم, و تقعد تدور ع النووى ف عشش الفراخ..فاكر انا..
* طيب اديك فاكر اهه..امال ازاى بتقول محررتهمش..؟!
- لا عندك حق برده.. الا صحيح مقلتليش..لقيت النووى ولا لسه؟
* هممم لا و الله لسه..بس جاتلنا معلومات انهم فككوه و حشو بيه البلح و عملوا البلح عجوه..
و حملوه على حمار و ادولوا خريطه العالم العربى ..و من ساعتها الحمار عمال يلف فى الدول كلها..
بس اطمنك..احنا متتبعين حركات كل الحمير و هنوصله..
- عجوه..؟!!!!
- تصدق صح ..انا كلت مره قرص عجوه بعد موضوع النووى ده..لقتنى بنور بعدها.
* يبقى الحمار وصل عندكم..قولى بسرعه..جيبت العجوه دى منين..؟
( اه يابن.... , يابن الامريكانيه..هتتلكك, مصدقت و عاوز تشبط فى اى حاجه )
- يا عم ده موضوع قديم..مش فاكر.. و بعدين العجوه زمنها اتهضمت من زمان.
* لازم تيجى معايا علشان اكشف عليك واعرف اصل العجوه دى منين..
( تكشف عليا..! آآآه ..انا مش مستريحلك من الاول..عمال تبصلى كده ..شكلك هتطلع منهم ولا ايه..
قال يكشف عليا قال..باكل انا اصلى من الكلام ده...و حياه أبو غريب.. )
- اه و ماله يا برنس..ابقى اجيلك بكره بقى و نشوف الحكايه دى .
*ماشى..بكره.
- اسيبك انا بقى..و ع العموم لو وصلتنى اى معلومه عن العجوه او الحمار هكلمك على طول..
سلام يا عم الفظيع..
ليست هناك تعليقات:
إرسال تعليق