حوار مع..عمو الأمريكانى الفظيع...( ج2 )

-صباح الخير يا عمو الفظيع..ازيك النهارده..
* اوووه..انتا تانى..عاوز ايه..؟
- ايه بس يا عمو..مخنوق منى ليه بس؟!.. ده انا بصبح عليك..لا لا ملكش حق..
* عاوز ايه تانى؟ ندردش برده..؟!
- يا سيدى بنتسلى مع بعضنا..و بنتعرف اكتر..
* هو احنا لسه متعرفناش بعد كل ده ..؟!
- لا لا مش قصدى اسمك ايه و انتا مين و كده...انا قصدى نعرف اكتر عن حياه بعض..
اعرف تاريخ حياتك و تعرف تاريخ حياتى..و كده يعنى..
* همممم...و عاوز تعرف ايه عن تاريخ حياتى العظيم..؟

( تاريخ حياتك العظيم..! متخلى الطابق مستور..احنا هنبتديها فشر )
-اكيد يا عمو عاوز اعرف كل حاجه .. كل اللى انتا عاوز تقوله, و كل اللى انتا عملته..
* هممممم ...احكيلك على ايه ولا ايه ولا ايه..انا تاريخى كله مليان بالبطولات الخارقه, اللى ملهاش مثيل..

(انخع كمان..انخع, بطولات ايه يا أبو....يا أبو بطولات )
- يا سلااااام...ده انتا شوقتنى اوى.. متحكيلى شويه من بطولاتك دى طيب..
*هممم..لا لا مينفعش..اصلك مش هتفهم الحاجات دى..
- ليه بس..طيب جربنى يمكن افهم...
* همممم...اما نشوف..

(يا باى ع العوجان..استنى عليا بس..ان محرقت دمك )
-يلا بقى يا عمو احكيلى.. اصلك شوقتنى اوى .
* تحب نبتدى منين؟ من اول تاريخ حياتى خالص ؟
- تمام.. احكيلى يلا عن اول حياتك..بدأت أزاى..قال صحيح أنتا اللى موتت الهنود الحمر و طردتهم من أرضهم؟!!
* امممممم.. بلاش الحكايه دى..خلينا نتكلم عن فتره بعد كده بشويه..
- ايوه بس يا عمو افتكرت..احكيلى عن بطولاتك فالحرب الاهليه..قال صحيح انتو كان عندكوا تفرقه عنصريه..؟!
انا لما قالولى مصدقتش..قلت مش ممكن عمو يعمل كده ابدا..
* امممم..و دى كمان بلاش..
- ايه يا عمو خير..احنا هنقضى تاريخك كله بلاش بلاش..؟ طيب تكلمنى عن ايه..
بقولك..متحكيلى حكايتك ف الحرب العالميه..احكيلى حكايه القنبلتين دول بتوع هيروشيما و نجازاكى..
اصلى سمعت عنهم و انا ف المدرسه..قال صحيح موتوا اكتر من 200000 واحد ؟
*آآ..أصل الموضوع..آآ..
- ماشى يا عمو ..فاهمك انا..بلاش دى كمان.
* ايوه..برافو عليك..
- خلاص احكيلى بس حكايه كوريا..ولا اقولك..احكيلى بتاعت فييتنام..بيقولوا حكايه حلوه قوى..
*لا لا .. انا زى مقولتلك انا مش هقدر احكيلك .. عشان انتا جاهل..مش تفهم البطولات.

( انا برده اللى جاهل, يا أبو جهل )
-خلاص يا عمو..براحتك..زى ما تحب..على كل حال انا مش عاوز ازعلك..ده انتا حبيبى..بس آآآ..
* بس ايه..؟!
- ممكن سؤال رفيع كده يا عمو..؟
* اسأل
- يعنى يا عمو انا مسمعتش عندكم عن ابطال مؤثريين ..طبعا غير حضرتك..يا ترى مفيش صحيح,
ولا انا اللى مش واخد بالى..؟
*مين قال كده..؟!!!! احنا بلدنا كله ابطال يا جاهل انتا..

( لسانك ده عاوز قطعه )
- انتا زعلت..انا مش قصدى خالص ازعلك..انا بس بسأل يعنى عشان اتعرف عليهم منك..
* انتا ازاى مش تعرفهم..ازاى مسمعتش عنهم قبل كده؟!
معقول مسمعتش عن سوبر مان ؟! ولا بات مان , ولا سبايدر مان , ولا هولو مان , ولا ايرون مان ,
ولا 6 مليون دولار مان...ولا اى مان
من دول..؟!!!!!!!
- ياسلااااااااااااااام..هما دول؟! اه و الله صحيح , ازاى بس نسيتهم .. أخص عليا.. طيب دول حتى حبايبى..
*شوفت .. مش قولتلك..اكيد تعرفهم
- بس انتا نسيت كام واحد برده..
* ميين..؟!
-ميكى ماوس , و بطوط , و توم و جيرى
* لا لا .. منسيتش ولا حاجه.. بس دول حاجه تانيه.. دول السوبر هيرو الجامدين اوى..
انا مرضتش اقولك عليهم احسن تتخض..
- احب فيك طيبه قلبك دى يا عمو..خفت عليا م الخضه..!!! يا حبيبى يا عمو.
* شوفت ازاى بخاف عليك..هات بوسه بقا..

( تانى..مافيش فايده فيك..ده انا قلت بلاش سوء الظن بتاع المره اللى فاتت..بس الظاهر انك منهم بجد )
- لا معلش يا عمو..عندى برد و كحه و زكام و ...و اى حاجه تمنع البوس...
يوووه ده انا افتكرت.. الحق اروح للدكتور بقى..اشوفك بكره.
سلام يا عمو..